Umidparty.org saytının müsahibi Ümid Partiyasının Suraxanı Rayon Şöbəsinin sədri Artur Sadıqovdur.
Artur bəy, son bir il ərzində ölkədəki vəziyyəti necə xarakterizə edərdiniz?
Sözsüz ki, ötən bir il bütün dünyada olduğu kimi bizim üçün də gərgin bir il oldu. Pandemiya dönəmində ölkədə işsizlərin sayı daha da artdı, çünki böyük əksəriyyət günəmuzd işləyən insanlar idi və pandemiya şəraitində qeyri-dövlət müəssisələrinin böyük əksəriyyətinin bağlanmasına görə işsiz qaldılar, ailələrinə çörəkpulu apara bilmədilər, sosial narazılıqlar artdı. Hökumət bu istiqamətdə düzgün siyasət sərgiləyə bilmədi. 190 manat verilən yardımlar işsizlərin hər birini əhatə etmədi və hətta yardım alan insanlar üçün yetərli bir məbləğ olmadı. Bilirsiniz, kommunal borclara görə vətəndaşlara güzəşt olunmadı, hətta bir çox yerlərdə bununla bağlı vətəndaşların üzərinə çox gedildi və ödəmə olunmayacağı təqdirdə kommunal xidmətlərin dayandırılacağı hədələri oldu, banklar kreditləri olanlara güzəştlər etmədi, bir sözlə əhali sistemsizlikdən çox böyük əziyyət çəkdi.
Bütün bu xoşagəlməz olaylarla yanaşı, ötən müddət həm də xalqın yaddaşına xoş hadisələrlə yazıldı. 44 günlük müharibə zamanı təxminən 30 illik işğaldan sonra bu gün demək olar ki, müəyyən qədər ərazilərimizin bərpasına nail olmuşuq. Lakin Rusiya qoşunlarının Qarabağa gəlməsi də bizi olduqca narahat edir. Rus qoşunlarının işğalçı olduğunu qəti şəkildə bildiyimiz üçün düşünürük ki, onların ərazilərimizdən uzaqlaşdırılması istiqamətində Azərbaycan Avropa ölkələrini, Qərb dünyasını prosesin içərisinə cəlb etməli, doğru-düzgün diplomatik addımlar atmalıdır.
Bu 44 gün ərzində xalqın birliyi nümayiş olundu, hər kəs ordumuza bacardığı dəstəyi verdi. Təəssüflə qeyd edirəm ki, müharibələr qələbələrlə yanaşı itkilərlə də müşayiət olunur, bu müharibədə də 3000-ə yaxın şəhidimiz oldu. Allahdan şəhidlərimizə rəhmət, yaralılarımıza şəfa, qazilərimizə can sağlığı arzu edirəm. Onlar öz rəşadəti, şücaəti hesabına vətən torpaqlarını işğaldan azad edə bildilər və adlarını qızıl hərflərlə Azərbaycan tarixinə yazdılar. Suraxanı rayonu üzrə də şəhid olan vətəndaşlarımız oldu. Ümid Partiyasının nümayəndələri, eyni zamanda da Azərbaycan dövlətinin vətəndaşı olaraq, şəhidlərimizin dəfnlərində iştirak etdik, ailələrinin dərdinə şərik olduq.
Müharibədən sonra insanların gözləntiləri böyük idi, böyük əksəriyyət fikirləşirdi ki, 44 günlük müharibə dönəmindəki milli birlik müharibədən sonra da davam edəcək. Bunun da nəticəsində ölkənin inkişafı, sosial vəziyyət, siyasi institutlarla münasibətlər fərqli müstəviyə çıxacaq. Təəssüf ki, bunların heç biri olmadı. Hakimiyyət 44 günlük müharibə dönəmində fərqli mövqedə oldu, müharibədən sonra yenə də əvvəlki vəziyyətinə qayıtdı. Qiymətlər artır, insanların sosial vəziyyəti ağırlaşır, sosial şəbəkələrdən də göründüyü kimi narazılıqlar artır. Məsələ belə davam edərsə, problemlər meydana çıxacaq.
Ötən ilin əvvəlində hər kəsə məlum olduğu kimi həm də parlament seçkiləri keçirilib. Parlament seçkiləri zamanı Ümid Partiyasının Suraxanı rayonu üzrə də namizədləri oldu və onların seçki kampaniyası zamanı apardıqları təbliğat və təşviqatının nəticəsi olaraq, bu gün rayon üzrə partiyanın üzvü, təəssübkeşinə çevrilən insanlar var.
Siyasi institutların fəaliyyəti üçün pandemiyadan dolayı məhdudiyyətlər – sosial məsafənin gözlənilməsi, insanların bir yerə toplaşması qadağası və s. yaransa, təşkilatlanma üçün münbit şərait olmasa da rayon şöbəmiz bu istiqamətdə fəaliyyətini davam etdirməyə müvəffəq olub. Partiyamıza üzvlük üçün virtual müraciətlər var və bu məlumatlar mərkəzi aparatdan rayon şöbələrinə ötürülür, rayonlar üzrə üzv olan insanlarla əlaqələr qurulur və partiyanın təşkilatlanma istiqamətində fəaliyyətimizi axsatmamağa çalışırıq. Pandemiya bitəndən sonra ilk işimiz məclisin iclasını keçirmək olacaq.
QEYD: Sadıqov Artur Müşviq oğlu 1960-cı ildə Bakıda anadan olub. İxtisasca psixoloqdur. Ümid Partiyası Ali Məclisinin üzvü, Suraxanı Rayon Şöbəsinin sədridir.
