Bu gün Əsrin Faciəsi olan Xocalı soyqırımının törədilməsindən 31 il ötür. Xocalı soyqırımının dünyada tanınması və bu faciəyə siyasi qiymətin verilməsi üçün Azərbaycan dövlətinin koordinasiyası ilə siyasi institutlar, Qeyri-Hökümət Təşkilatları, Diaspor təşkilatları, vətəndaş cəmiyyətləri, KİV bu istiqamətdə davamlı fəaliyyət göstərməlidir.
Azərbaycanın qədim yaşayış məskənlərindən olan Xocalının 1992-ci il fevral ayının 25-dən 26-na keçən gecə rus – sovet alayının iştirakı ilə, erməni vandalları tərəfindən yer üzündən silinməsi üçün dəhşətli soyqırım törədildi. 7000 əhalisi olan Xocalı, Xankəndindən 10 km cənub şərqdə, Qarabağın dağlıq hissəsində, Ağdam-Şuşa-Əsgəran-Xankəndi yollarının üstündə yerləşir. Qarabağdakı yeganə aeroport da məhz Xocalıda idi. Ermənilərin Xocalıya xüsusi maraq göstərməsi də Xocalının strateji mövqeyə malik olması ilə əlaqədar olub.
Xocalıya hücum hazırlığı fevralın 25-də, 366-cı motoatıcı alayın hərbi texnikasının döyüş mövqelərinə çıxması ilə başlandı. Şəhərə hücum tanklardan, “Alazan” tipli zenit toplardan 2 saatlıq atəşdən sonra həyata keçirildi. Xocalıya 3 istiqamətdən hücum olduğu üçün şəhərdə qalan 2500 nəfər xocalılı Ağdam rayon mərkəzinə çatmaq ümidi ilə şəhəri tərk etdilər. Lakin Naxçivanik kəndi yaxınlığında əhalinin qarşısı erməni silahlı quldur dəstələri tərəfindən kəsildi və onlar gülləboran edildi. Qarlı aşırımlarda və meşələrdə zəifləyib taqətdən düşən insanların çox hissəsi də məhz Əsgəran-Naxçıvanik düzündə xüsusi qəddarlıqla qətlə yetirilidi. Şəhəri tərk edən Xocalı sakinindən 613-ü düşmən gülləsinə tuş gəlib, soyqırımın qurbanı oldular. Bu soyqırımın nəticəsində 63-ü uşaq, 106-sı qadın, 70-i qoca və qarı olmaqla, yüzlərlə Xocalı sakini qətlə yetirildi. 8 ailə tamamilə məhv edildi, 25 uşaq hər iki valideyini, 130 uşaq isə valideynlərindən birini itirdi. Düşmən gülləsinə tuş gəlib yaralanan 487 nəfərdən 76-sı uşaq idi. 1275 xocalılı əsir, 150 xocalılı isə itkin düşdü.
Ümid Partiyası olaraq, Xocalı faciəsinin beynəlxalq aləmdə soyqırım kimi tanınması istiqamətində təkliflərlə çıxış etmiş, dünya ictimaiyyəti qarşısında bu faciəni törədənlərə qarşı tələblərimizi dəfələrlə irəli sürmüşük.
Xocalı soyqırımının beynəlxalq aləmdə xalqımıza qarşı soyqırım kimi tanınması ilə yanaşı, Xocalı şəhərinin azadlığı da bu gün hər birimizi narahat edən ən önəmli məsələlərdən biridir.
44 günlük Vətən Müharibəsindən sonra masa üzərində bu sualın öz həllini tapacağı istiqamətində Ümid Partiyası öz mövqeyini açıq ifadə edib, hər qarış torpağımızda dövlətimizin suveren hüquqları bərpa olunmalıdır.
Xocalı soyqırımının dünyada tanınması və bu faciəni törədənlərin cəzasız qalmaması üçün isə haqlı mübarizəmizə hər zaman davam etdirəcəyik.
Azərbaycan Ümid Partiyası / Azerbaijan Umid Party -sı torpaqlarımız uğrunda canından keçən igidlərimizin ruhu qarşısında baş əyir, ərazimizin bütövlüyü uğrunda qurban gedən şəhidlərimizə Allahdan rəhmət diləyir, qazilərə can sağlığı arzulayır!
Şərh yaz
