Azərbaycan Ümid Partiyasının sədri İqbal Ağazadə Pakistan İslam Respublikasının Azərbaycandakı fövqəladə və səlahiyyətli səfiri cənab Qasım Mohiuddinə Pakistanın Müstəqilliyinin Elanı Günü münasibətilə təbrik məktubu göndərib.
Təbriki izləyicilərə təqdim edirik:
Pakistan İslam Respublikasının Azərbaycandakı fövqəladə və səlahiyyətli səfiri Qasım Mohiuddinə
Hörmətli Səfir,
14 avqust Pakistan Respublikasının müstəqilliyinin elan edilməsi münasibətilə Sizə və Sizin simanızda qardaş Pakistan xalqına öz adımdan və rəhbərlik etdiyim Ümid Partiyası adından ən səmimi təbriklərimi yetirirəm.
Azərbaycan Respublikası ilə Pakistan İslam Respublikası arasında ortaq tarixi, dini, mədəni əlaqələr vardır. İki ölkə arasındakı bu dostluq münasibətləri qardaş xalqlarımızın iradəsindən qaynaqlanır.
Altı il öncə Azərbaycan üçün taleyüklü və həlledici məqam olan – 27 sentyabr – 10 noyabr 2020-ci il Ermənistan-Azərbaycan arasındakı 44 günlük savaşda – Vətən müharibəsində ölkəmizin ərazi bütövlüyünün bərpası ilə bağlı Pakistan qəti mövqe nümayiş etdirdi.
Qardaş Pakistanın bizim haqq işimizdə göstərdiyi tərəddüdsüz dəstək və həmrəylik xalqımız tərəfindən olduqca yüksək qiymətləndirilir.
Bu gün də Azərbaycan və Pakistanın dostluq, qardaşlıq, əməkdaşlıq münasibətlərinin inkişafı bizi sevindirir.
Bu əlamətdar gündə Sizə cansağlığı, uzun ömür, qardaş Pakistan xalqına daim əmin-amanlıq və firavanlıq arzulayıram.
Hörmətlə,
Azərbaycan Ümid Partiyasının sədri
14 avqust 2026
Şərh yaz
