Məxfi məlumatların mübadiləsi ilə bağlı yeni dəyişiklik: Azərbaycan və Ukrayna nəyi yeniləyir? – ANAR İSAYEV şərh edir
Azərbaycan və Ukrayna arasında hökumət rabitəsi sahəsində əməkdaşlığı tənzimləyən sazişə dəyişiklik edilməsi barədə protokol Milli Məclisin plenar iclasında müzakirəyə çıxarılıb və birinci oxunuşda qəbul edilib. Dəyişiklik əsasən məxfi məlumatların mübadiləsi və xüsusi rabitənin təhlükəsizliyinə cavabdeh dövlət qurumlarının hazırkı institusional struktura uyğunlaşdırılmasını nəzərdə tutur.
Azərbaycan və Ukrayna arasında xüsusi rabitə sahəsində hüquqi bazanın yenilənməsi məxfi məlumat mübadiləsinin təhlükəsizliyinə hansı təsirləri göstərə bilər?
Sazişə edilən dəyişiklik Azərbaycan və Ukrayna arasında dövlət qurumları səviyyəsində informasiya və kommunikasiya əməkdaşlığının inkişafına hansı imkanları yarada bilər?
Azərbaycan Ümid Partiyasının İdarə Heyətinin üzvü Anar İsayev Bizimyol.info xəbər portalına açıqlamasında bildirib ki, Azərbaycan və Ukrayna arasında xüsusi rabitə sahəsində hüquqi bazanın yenilənməsi, ilk növbədə, iki ölkənin dövlət qurumları arasında məxfi məlumat mübadiləsinin daha təhlükəsiz, institusional baxımdan daha aydın və müasir texnoloji tələblərə uyğun həyata keçirilməsinə hesablanıb.
Bu dəyişiklik sadəcə texniki xarakter daşımır. Məxfi informasiyanın hansı kanallarla və hansı təhlükəsizlik prosedurları əsasında ötürülməsinin hüquqi çərçivəsinin yenilənməsi dövlətlərarası informasiya mübadiləsinin etibarlılığını artıran mühüm mexanizmdir.
Xüsusilə təhlükəsizlik mühitinin sürətlə dəyişdiyi və kibertəhdidlərin dövlət kommunikasiyalarına ciddi risk yaratdığı şəraitdə xüsusi rabitə sistemlərinin hüquqi və institusional baxımdan daim yenilənməsi xüsusi əhəmiyyət daşıyır. Tərəflərin bu sahədə məsul dövlət qurumlarını mövcud institusional struktura uyğunlaşdırması məlumatların mühafizəsi ilə bağlı səlahiyyətlərin daha dəqiq müəyyənləşdirilməsinə və əməkdaşlığın praktiki mexanizmlərinin təkmilləşdirilməsinə imkan yaradacaq.
O bildirib ki, yenilənmiş hüquqi baza Azərbaycan və Ukrayna arasında dövlət qurumları səviyyəsində təhlükəsiz informasiya və kommunikasiya mübadiləsinin genişləndirilməsi üçün əlavə imkanlar yaradacaq. Buraya xüsusi rabitə kanallarının inkişafı, informasiya təhlükəsizliyi üzrə təcrübə mübadiləsi, texniki imkanların uyğunlaşdırılması və aidiyyəti qurumlar arasında koordinasiyanın gücləndirilməsi daxil ola bilər.
Bu baxımdan, sazişə edilən dəyişiklikləri yalnız mövcud sənədin texniki yenilənməsi kimi deyil, iki ölkə arasında dövlət səviyyəsində təhlükəsiz kommunikasiya infrastrukturunun hüquqi əsaslarının müasir tələblərə uyğunlaşdırılması kimi dəyərləndirmək lazımdır.
Şərh yaz
